政情：回到03年？ 孔昭華新冠嗌錯做非典
油尖旺區議會尋日舉行大會，新冠肺炎疫情相關議題仍然係一眾區議員嘅討論焦點。之但係，依家明明已經係二○二○年，點解會有區議員嘅記憶仲停留喺二○○三年，話依家有俗稱「沙士」嘅「非典型肺炎」嘅病人嘅？講緊嘅就係本身喺尖沙咀西選區擔任咗三屆區議員、今屆轉戰九龍站選區勝出嘅民建聯區議員孔昭華。
話說依家因為疫情導致公立醫院服務緊張，醫院管理局將部分非緊急服務暫停，並透過公私營合作將部分病人轉至私家醫院。孔昭華發言時，就唔小心將並非患上新冠肺炎嘅病人，包括初生嬰兒、癌症病人等等，噏錯咗做「呢個非典型肺炎嘅病人」。
兩分半鐘噏錯兩次
查實孔昭華嘅發言係希望醫管局喺疫情持續時，可以考慮擴大依家公私營合作方式，照顧埋患有其他慢性病嘅病人，例如腎衰竭等等。不過，喺佢呢段短短兩分半鐘嘅發言中，佢就再次將呢啲「非緊急病人」噏錯咗做「非典型肺炎嘅病人」喇！