政情：因文章遭處分「民主黨變了」 陳莊勤自爆退黨

陳莊勤喺文章入面透露，佢喺舊年七月就示威者衝擊立法會，發表文章批評泛民主派政黨包庇暴力。其後民主黨中央委員會同紀律委員會同佢反映，話有民主黨成員投訴佢篇文章損害民主黨聲譽，所以要進行聆訊，以及進行紀律處分。陳話中委唔畀佢就文章內容事實答辯，聆訊唔夠一個鐘就決定革除佢嘅黨籍，佢知道後隨即提出咗退黨通知。

斥鼓吹歧視 背棄初衷

陳話過去嘅事本來都唔想提o架，但近日見到民主黨中委蔡耀昌因堅持反歧視而被迫辭去黨內所有職務，令佢覺得要對民主黨近年嚟嘅轉變不吐不快。佢指疫情之下，民主黨將商戶拒絕招待內地人合理化，扭曲為合理嘅防疫措施，為歧視行為開脫，陳認為民主黨明顯背棄咗創黨嘅初衷同基本信念。

佢話民主黨支持香港民主回歸、二○一○年民主黨反對「五區公投」、支持特區政府當時提出嘅政改方案。佢話：「陳莊勤仍然是二○一○年時民主黨的民主黨人，今天改變了的是民主黨而不是陳莊勤。」

指打壓異己 統一思想

另外陳又話，喺中委會處理暫停佢黨籍嘅聆訊入面，民主黨中委袁海文問佢，既然同民主黨嘅立場咁唔同，點解唔退黨。陳回覆袁指自己依家係民主黨嘅非主流，去到呢個聆訊先發現民主黨唔容許非主流，而係要統一思想，佢仲反問袁同中委會主席胡志偉：「那麼民主黨與共產黨有甚麼分別？」

袁海文回覆稱陳莊勤被革除黨籍，係因為陳以民主黨創黨成員嘅身份發文，而文章嘅內容同民主黨嘅立場南轅北轍，所以理論上先要革除佢嘅黨籍。至於陳反問民主黨同共產黨有咩分別，袁話革除黨籍嘅決定係基於陳發文內容唔可以代表民主黨，同共產黨打壓異己嘅手段完全無得比。