政府日前公布推出逾千億元嘅第二輪防疫抗疫基金措施，當中包括補貼港鐵由七月起車費減價兩成，為期半年。有人就問運輸及房屋局局長陳帆，專營巴士係咪都應該提供類似折扣，但佢就話由於巴士票價受政府規範，政府已因應疫情叫停巴士公司嘅加價申請，冇得加即係變相減價喎。話時話，之前包括陳帆在內嘅一眾高官，喺新冠肺炎疫情下仲諗住逆市加薪，只係後期在輿論壓力下才焗住減薪一成，否則唔減薪仲要加薪，如果引用陳帆嘅「唔加價就變相減價」嘅邏輯，咁班高官咪加好多人工？
