政情：政團成立「要求陳淑莊下台大聯盟」
新冠肺炎疫情肆虐，政府早前宣布禁止超過四人喺公眾場所聚會，又下令酒吧關閉十四日。不過，身為大律師嘅公民黨議員陳淑莊早前涉嫌違反「禁聚令」，聯同逾四十幾人喺深水埗一間酒吧舉行聚會。有政團鬧爆當日出席嘅人士「前言不對後語」，疑點重重，激嬲唔少市民，對呢件事表示強烈譴責，發起聯署活動之餘，仲特意成立「要求陳淑莊下台大聯盟」，提出包括要求陳淑莊引咎辭去議員一職等訴求。
促公開道歉
大聯盟由政團公民力量成立，並提出五大訴求，當中包括要求陳淑莊辭職落台、要求陳與其黨友兼香港中小企食店聯盟召集人林瑞華公開道歉、要求有關人士主動自首，仲有公開當日出席者名單，並進行十四日隔離，以及公開閉路電視片段。不過，陳淑莊連日來死撐話自己以議員身份去開會，而抵達涉事處所時已「半落閘」，亦清楚貼上「Private（私人）」的字樣。