政情：譚健業驚洩密 唔用視像開會
為防感染，群組聚集可免則免，而視像通訊程式，就成為遙距開會最熱門嘅選擇。博愛醫院歷屆總理聯誼會副主席譚健業，就仍然堅持採用面對面嘅形式去開會。佢話視像通訊程式的確係方便，但鑑於有洩露機密嘅風險，用嚟同朋友天南地北咁打下牙骹就無妨，但重要嘅會議，都係親身出席比較好。
指手機程式或存安全漏洞
除咗博愛醫院歷屆總理聯誼會，譚健業亦都係九龍樂善堂嘅校董會成員。佢話校董會會議嘅內容，可能會牽涉敏感資料，若果外洩就會相當麻煩，或者係呢個緣故，佢未見過有學校嘅校董會，會使用視像通訊程式嚟遙距開會。佢又話，只要先探熱，戴口罩同埋坐席之間保持適當距離，就已經好安全。其實除咗視像通訊，部分供手機下載嘅應用程式，亦有指可能存在安全漏洞。佢認為下載之前，要先睇清楚應用程式會唔會列出允許存取手機內嘅媒體資料等條件。如果有顧慮的話，就唔好撳同意鍵喇。