政情：次輪基金遺漏失業軍 吳秋北寸爆高官離地
港府日前推出第二輪防疫抗疫基金後，隨即被批漏洞多多。除咗畀位啲無良老闆食盡人血饅頭之外，措施對失業人士嘅幫助更加係零。政府呢啲「史無前例」政策，更加激到好少公開鬧政府嘅工聯會會長吳秋北昨日喺Facebook出咗個極盡挖苦嘅貼，寸爆班高官離地、做事唔夠細緻，更希望佢哋能用上爆燈嘅IQ（智商），好好諗清楚成立「緊急失業援助金」嘅必要性喎。
其實近排唔同嘅建制陣營都有公開建議政府成立「失業金」，為失業率飆升做準備。可惜，政府第二輪防疫抗疫基金仍然未有顧及失業市民嘅需要，勞工及福利局局長羅致光都只係叫有經濟困難嘅市民去申請綜援。
勿將失業者推畀綜援
或者吳秋北就係畀呢番說話激親，尋日喺Facebook鬧爆特首林鄭月娥同羅「依然離地」，並反問如果綜援有用，政府又何須接連推出抗疫基金？吳又挖苦班官唔夠同理心，勸佢哋既然做好事，就唔該做得細緻到位啲啦。
吳強調，「失業金」同綜援有別，前者針對嘅係「緊急失業」同「救急扶困」，況且打工仔都唔想做綜援戶，反問「高官能夠領會打工仔呢個心思嗎？」吳最後亦寸爆羅致光要識得特事特辦，叫IQ爆燈嘅羅再三思，盡早成立失業金，而唔係將失業人士推畀綜援啊。