政情：張華峰原來做過運動員

加入校隊 擲標槍鐵餅

話說肥老闆早排喺立法會上自爆曾經係運動員，當時佢一講完，在場有唔少議員都忍唔住笑。到底肥老闆係玩開咩運動？相信大家一睇到佢嘅身形，可能會以為佢當年係玩相撲、舉重之類有關嘅運動，其實當年嘅佢係玩開擲標槍同埋擲鐵餅，仲係校隊嚟添，真係估佢唔到。

肥老闆透露，當年自己身材比較高大，不過對腳唔夠長、身形又唔夠瘦，所以唔適合跑步，因此會揀標槍同鐵餅。當年嘅佢喺學校係拎第一，亦都曾經代表學校參加比賽，不過就只係得第四定第五名。而佢做校隊運動員約莫三年左右，就礙於謀生關係，一離開學校就冇再玩喇。而佢仲話，標槍同埋鐵餅唔係掟出去咁簡單，因為兩樣嘢都會轉吓轉吓，所以要有適合嘅力度先掟到。