中環出更：狄志遠成單一口罩供應商 教局引薦惹質疑
全港停課已一段時間，有機會喺本月底復課，但好多學校喺採購口罩都遇上困難。教育局早前就引薦香港家庭教育學院總監狄志遠團隊同小學學界洽商，提供中童口罩予全港資助小學，確保口罩有穩定供應。不過，社會上有人質疑局方，點解只係推薦狄志遠團隊，而唔搵其他團體幫手，認為口罩嘅來源應該盡量多元化咁話。
網民除咗質疑狄志遠成為單一口罩供應商外，更有網民對其生產嘅口罩防禦效果抱有疑問，又話就算口罩質素得到驗證，每日口罩嘅供應數量，是否足夠提供畀數以十萬計嘅中小學童使用呢？如果口罩質素同數量唔能夠滿足學童需要，點解又要嘗試復課呢？
教局：無參與雙方日後合作
教育局局長楊潤雄前晚喺社交平台，承認早前引薦狄志遠團隊同小學學界洽商，向全港資助小學提供中童口罩，務求確保有穩定供應，但強調必須以成本價轉售。教育局發言人回應話，局方並無參與雙方往後合作嘅討論。
我哋尋日晏晝向狄志遠查詢，佢話生產口罩嘅機器正於試行階段，希望日產五至六萬個，雖然唔能夠滿足全港中小學每日九十萬個嘅使用量水平，但狄志遠仍希望等到復課時，能夠照顧到有需要嘅學生，又話如果到時需求量大，亦會考慮邀請社會企業為合作夥伴。
卓妮