中環出更：表演場地關閉 鄭至芝：劇團憂生計
舞台係社會嘅縮影，當社會面臨嚴峻挑戰，舞台藝術從業員亦難以安逸。從事舞台藝術嘅傑青鄭至芝（Gigi），就指城中嘅表演場地因避疫而封館，除導致演出受阻，亦影響到劇團營運，相關工作人員手停口停。雖然藝術發展局曾予以援助，但畢竟杯水車薪，難以解決劇團目前所面對嘅困境。
Gigi指劇團去年有一齣以正生書院為藍本嘅話劇演出，甚受觀眾好評。本來打算喺上個月再度公演，誰知演出場地因疫情而關閉，演期要延至十二月。屋漏更逢連夜雨，目前學校停課，劇團連到學校演出嘅機會都告吹，惟有為禁毒基金會拍攝短片並向學生播放。然而要得到報酬，就要有八十間學校達到一定嘅播映場次同觀眾人數。由於難度頗高，Gigi擔心倘未能達到對方開出嘅條件，劇團同相關工作人員嘅處境將更艱難。Gigi又話有同行為賺取生計，無奈以「炒散」形式從事清潔或餐飲外賣，但礙於百業蕭條，就算臨時工嘅飯碗亦隨時不保。
正生話劇無法如期重演
除舞台演藝界，教育界嘅運作亦幾陷於停頓，不過正生書院就例外，校長陳兆焯話學生都置身於孤立嘅校園環境中，所以毋須停課，不過就要暫停家長探訪，同教職員每逢外出歸來都必須戴口罩。對於故事係以正生書院為藍本嘅話劇，陳校長話舊年佢都有睇過，仲盛讚劇本寫得唔錯，如今因疫情而無法如期重演，更大呼可惜。
儘管市道不景，但香港話劇團第一副主席蕭楚基，就指話劇團去年成績甚佳，多場演出近乎滿座，內地人亦專程搭飛機嚟捧場，所以話劇團今年有人工加。佢又話因醉心於舞台藝術，從而投身話劇行業者，好多都唔係泛泛之輩，具專業資格或雙學位者，話劇團內亦大不乏人，而演員背誦台詞嘅驚人記憶力，亦令佢相當佩服。佢覺得舞台藝術人才難得，值得享有相稱嘅薪酬待遇。
卓妮