中環出更：疫情嚴峻暫停派飯 愛心飯團期待復出
疫情之下社會運作大受阻礙，就連慈善活動都陷於停頓。每個星期都喺深水埗向老弱派飯嘅志願團體「愛心飯團」，多年來都風雨不改。然而鑑於確診個案有增無減，為免疫情擴散，上月廿三日向老友記派完飯盒後，活動就要暫停，待疫情過去先捲土重來。愛心飯團名譽會長嚴偉貞話暫停行動係創辦人黃國權嘅意思，一眾成員都認為政府規定禁止超過四人喺公開場合聚集係正確嘅。
咁到底有無後備方案，例如派義工單獨上門探訪獨居長者呢？嚴偉貞話大家商量過都覺得有一定感染風險，亦考慮到保安員可能唔准義工上樓，諗過度過之後，最終打消呢個念頭。
嚴偉貞飲蒜頭水抗疫
嚴偉貞又話有一次出席派飯活動後，感到有啲唔舒服，於是每日早上飲薑茶，夜晚就飲「蒜頭水」嚟調理身體，過咗幾日又再生龍活虎。
至於黃國權就話本來都想繼續派贈防疫用品同飯盒，但考慮到疫情愈趨嚴峻，唔想太多人喺佢位於深水埗嘅車行門外聚集，加上避免義工冒住風險幫手派物資，結果喺取得會員共識下，決定同類型活動全部暫停，等疫情受控先再服務社會。咁有無遇到啲長者因為花時間排隊同拎物資而發脾氣呢？佢話秩序大致良好，因為會分兩條隊派物資，一條畀預先登記咗嘅老人家，另一條就專為臨時到場嘅長者而設。
但金紫荊女企業家協會無懼疫情，照樣舉辦活動，但模式有少少唔同，佢哋會因應地區需要，將防疫物資轉交各區服務中心，再由中心派畀有需要嘅人士，好似日前就將一批包括口罩、白米、午餐肉在內嘅「抗疫愛心包」捐贈到石硤尾嘅視障人士福音中心，為視障人士打氣；上月初就喺觀塘區同花園大廈關愛組合作，捐出各式各樣嘅抗疫物資同食物畀合共二百位長者同弱勢社群。金紫荊女企業家協會永遠榮譽會長丘璟珊話，四月份會有同類型活動，但細節就未落實。
卓妮