政情：公民講場：言論一撤再撤 袁國勇驚青又道歉

本港新冠肺炎疫情平穩後又轉趨嚴重，各界都炮轟政府防疫抗疫無能，無論小市民甚至是醫護界都一肚怨氣。好似港大微生物學系講座教授袁國勇日前就狠批部分政府官員輕視疫情，形容係「唔見棺材唔流眼淚」，本來佢只係事實陳述，鬧得好正確，但唔知係咪佢因為上次話新冠肺炎係由中國人濫捕濫食野生動物所致嘅言論掀起政治風波，所以驚咗，今次主動就「棺材論」向市民致歉，話有時自己太過忟，所以用咗啲詞語可能太激烈喎。如果一忟就爆seed語出驚人，咁疫情持續落去，睇嚟佢要頻頻道歉喇！