政情：岑智明患眼疾 棄日內瓦新職
天文台前台長岑智明喺天文台工作咗三十四年，今年二月中正式退休，原定四月初就會去日內瓦世界氣象組織擔任服務司司長。但岑智明前日稱，因為要做青光眼手術，所以去唔到就任服務司司長喇，真係天氣不似預期，唔使走亦唔使飛。
將接受青光眼手術
岑智明前日喺社交媒體發文，話因為要處理身體問題所以同各位網友久違，並宣布已經向世界氣象組織（WMO）秘書長佩特里·塔拉斯（Petteri Taalas）教授表明將未能就任服務司司長一職，獲得秘書長接受同諒解。岑將會於短期內接受青光眼手術，未來會休養一段時間，希望可以緩減視力下降。
岑話最近好多朋友都問佢，會唔會因疫情或眼疾而影響到前往日內瓦履新嘅計劃。佢感謝大家嘅關心，以及多謝一班曾經幫過佢申請加入WMO工作嘅同事同朋友。唔少網民都留言表示可惜，但亦有人話身體健康最重要，醫好對眼先可以繼續睇天氣嘛。