政情：陸頌雄倡購東京奧運轉播權 政府耍手
新冠肺炎疫情肆虐全球，令原定今年七月舉行嘅東京奧運會要延期到明年舉行。工聯會議員陸頌雄就問民政事務局會否考慮購買東京奧運會嘅轉播權，供本地免費電視台播放，畀全港市民都可以免費收睇東京奧運會，但有關當局就話過去四年，政府從來未出資購買大型國際體育賽事嘅轉播權。
當局回應亦指，世界各地每年都會舉辦各種大型國際體育活動，而賽事轉播安排，係由有關主辦單位按賽事嘅性質及運作需要而制定，主辦機構會按政策及規章，以市場機制出售轉播權予合資格嘅傳媒機構或有關聯嘅公司。
話一直透過商業市場運作
當局稱明白市民關注可否於免費電視上觀賞奧運賽事，而奧運會喺香港播放嘅情況，一直都係透過商業市場運作。政府有留意本港電視台洽購播映權嘅情況。陸頌雄入紙提問就係想政府考慮買轉播權，估唔到換來一堆廢話。