政情：無視選舉暴力 敬老都驚反對 選管會堅離地

有候選人被圍 報告隻字不提

近年無論區議會或立法會選舉，好多投票站都出現打晒蛇餅嘅選民人龍，選管會就喺上月提出多項建議，包括票站主任可以安排七十歲或以上嘅高齡長者、孕婦及行動不便人士等有特殊需要嘅選民優先投票、限制監票人數和登記身份證等。本港喺去年同時經歷連串反修例示威衝擊及區議會選舉，建制派喺選舉中大敗，其後亦多次炮轟選管會未有確保選舉公平。

其中成功連任區議員嘅李慧琼尋日就喺電視論壇上，指去年選舉有建制派候選人被圍、被起底、辦事處遭縱火等，但選管會嘅報告就隻字不提，反問係咪日後要候選人着晒防刺衣保護自己。佢仲話，有長者等投票時唔舒服，但票站主任擔心被人批評不公平，因而拒絕讓長者入票站等候，直斥馮驊離地，仲認為讓長者優先投票係「敬老」，但因為社會政治化而遭反對。

前屯門區議員甘文鋒就話，其辦事處喺選舉期間遭三次破壞，直斥選管會忽略選舉暴力事件，應重新考慮是否需要作出回應。至於投票問題，他認為票站不足，建議喺一個票站內應再分拆細票站作分流。

議員促為長者提供舒適環境

出席同一論壇嘅民主派朱凱廸就反駁，話冇人會反對敬老，甚至批評選管會嘅建議係撈亂問題，指長者係「等得但唔企得」，政府應該增加人手同埋票站，提供舒服嘅投票環境及減少輪候時間，而唔係畀長者優先投票，犧牲其他選民。

選管會今次諮詢將於明日截止，相信不論建制派定民主派都會把握最後機會提交意見。喺兩派都炮轟嘅情況下，到底選管會係接受意見定係態度照舊，還是真係順應民意正視問題呢，咁就要拭目以待喇！