中環出更：立會暴劫停開 紀念品店賺少10萬
立法會喺舊年七月遭示威者闖入並大肆破壞，受到池魚之殃嘅紀念品店，其營銷收入到底會受到幾大影響呢？秘書處早前回覆議員關於特別財會嘅書面質詢，指綜合大樓歷劫之後暫停運作，而紀念品店亦隨之要停業，少賺咗嘅數額則接近六位數字。
金屬書籤最好賣
據秘書處提供嘅數據顯示，雖然紀念品店喺上年度都仲有錢賺，由二○一九年至今年二月期間共十一個月，合計賺咗一萬八千多元，不過同一八至一九年度相比，就賺少咗成十萬元。秘書處亦指，綜合大樓喺舊年七月一日被闖入之後暫停開放，而紀念品店就去到同年十月八日先至恢復營業。停業咗一大段時間，唔怪得收入大減啦。
至於上年度邊種商品最好賣？顧客最愛嘅熱賣商品依然係金屬書籤，喺銷售榜上已經連續第三年蟬聯第一，而第二嘅就係摺疊式餐盒，排名第三就係木製筷子湯匙套裝。
卓妮