新一份財政預算案全民派一萬蚊，惟立法會秘書處尋日就財政預算案發表研究報告提到，政府早幾年派六千蚊用咗廿一個月，前年派四千蚊都用咗十九個月，行政費高達成十億，真係又慢又貴！財經事務及庫務局局長劉怡翔被鬧爆派錢慢到得人驚，外界建議今次派錢用新科技喇，但又推說轉數快、PayMe等唔得，若果嚟緊派錢又係咁龜速，有排都落唔到市民袋嘅話，市民唔躁爆先奇！
