近年政府跟上潮流，製作唔同嘅宣傳短片再放上網上社交媒體播放，但呼籲市民同反修例暴力割席嘅短片收視，差過抗疫宣傳短片。根據政府新聞處回應議員就財政預算案的提問，按新聞處YouTube頻道計算，截至上月八日，舊年八月至今年一月製作嘅修例短片中，收看次數最低嘅約有十萬三千次；但今年一月先製作嘅新冠肺炎短片中，收看次數最低亦有二十四萬六千次。
根據資料顯示，新聞處就修例製作咗七套短片同宣傳聲帶，花費約二百四十七萬元，喺網上社交平台的廣告費用就花費約七十五萬元。七套宣傳片中，喺YouTube頻道收看次數最低係「珍惜香港 這個家（I）」，收看次數十萬三千二百零四次，同時喺Facebook（Fb）及Instagram都係收視最差，有六十一萬多次，製作費約六十一萬元；而收看次數最高嘅係「青紅皂白 清楚明白」，喺YouTube頻道逾一百十一萬次，喺Fb同Instagram就逾四百二十六萬次，製作費約三十九萬元。
至於有關抗疫嘅短片，新聞處及衞生署製作咗七套宣傳短片，大約花費五十三萬四千元，其中有四條短片放喺網上平台播放，大約花四十萬元。至於Fb同Instagram方面，收看次數最高係「同心抗疫」，逾一百四十萬次。