政情：酒吧停業前夕 陳淑莊帶40人去蒲？
政府前日宣布尋日下午六點前要酒吧關閉十四日，政府呢頭講完，有網民前晚十一點就見到公民黨陳淑莊帶住四十人去咗深水埗一間酒吧，唔通希望趕喺酒吧關閉前最後一晚盡情狂歡？
稱為開公務會議
有口痕友話，間酒吧半落閘，似有古怪；話時話，政府之前都公布咗社交戒嚴令，唔畀四個人坐埋一齊，依家成四十人，隨時增加播毒風險喎。口痕友仲話，前晚警方收到舉報到場，陳淑莊貌似半醉，上咗一架的士迅速離開，現場更有人同警方講係開股東大會。
但陳淑莊就否認前晚去蒲吧，事緣政府突然宣布要酒吧停業十四日，佢去深水埗酒吧就係要同受影響嘅飲食業人士林瑞華等人開會，籌備尋日朝早十點喺立法會舉行嘅記者會，強調無聚眾，而酒吧當時亦冇營業，佢係以議員身份出席公務會議，完全無違法。又話警方收到噪音投訴，大約午夜時分，四名警員到場了解情況之後就離開，無驅散任何人，會議繼續至大約深夜二時結束。
其實議員為公務開會係無可厚非，但依家疫情咁嚴峻，點都要保持社交距離，太多人聚集，如果其中有人係隱形患者，就好容易中招。