政情：為抱乖孫 郭振華搓手液傍身
喺疫情持續下，保持個人衞生對抗疫嚟講好重要，如果要接觸小朋友或者BB就更加要小心喇！香港工業總會名譽會長郭振華上個星期啱啱抱孫，但因為疫情關係，囝囝唔畀佢去探孫仔住，為咗可以抱吓乖孫，佢惟有酒精搓手液傍身，做好個人衞生。
點解唔畀探孫？郭振華話女兒最近由英國返嚟，雖然無病徵但都選擇喺屋企隔離，囝囝擔心會造成交叉感染，所以唔畀探孫仔住，而抱孫心切嘅佢希望快啲度過呢個隔離期。
做拍手操減肥 增抵抗力
依家市民都盡量留喺屋企，郭亦唔例外。佢話留喺屋企嘅時間多咗，成個人都肥咗添！為咗減肥同提高抵抗力，佢會喺屋企做拍手操，拍打手臂同膊頭十幾下。佢話拍打嘅位置都係穴位，可以令肺部擴張，肺部功能好，就唔使咁驚新冠肺炎喇！