政情：林亨利減磅成功 反被問係咪病咗
男士唔注意飲食習慣同作息時間，好容易「中年發福」或者有「啤酒肚」。九龍社團聯會總幹事林亨利（Henry）都「走唔甩」，本身體重二百四十磅嘅佢呢排成功減磅，減咗四十幾磅之餘仲瘦咗五吋腰添！但就呻話成日畀人問「係咪病咗，所以先瘦咗？」真係唔知好嬲定好笑呀！
過程唔易 自我催眠飲水飽
雖然減磅成功，但Henry話過程都唔容易o架！佢話減磅主要靠節食，晏晝飯可免則免、晚餐就淨係食麵包，肚餓嘅話都會keep住自我催眠話「飲水飽」，仲連飲啤酒嘅習慣都戒甩埋添！佢依家每日會出外慢跑，仲話夜晚十點準時瞓覺，否則會覺得好大壓力咁話喎。
Henry點解要減磅？佢話人到中年都會擔心身體，加上本身有參加制服團體，覺得fit啲着制服都靚仔啲。至於會唔會順便練幾舊「朱古力」？佢就話唔會啦，但都好滿意依家嘅體重，笑言「如果再遲啲（年紀大）就減唔切啦！」