中環出更：檢控官著「黑暴秘笈」 葛珮帆促律政司交代
負責為刑事案件提供法律意見嘅律政司檢控官翁達揚，半年前出版一本法律常識書籍，被指教導疑犯「避開法律陷阱」，猶如「黑暴秘笈」。議員葛珮帆（EQ）就話，翁嗰頭畀法律意見警方睇吓係咪要檢控疑犯，轉頭又出書教人避法律陷阱，涉嫌利益衝突同公職人員行為失當罪，所以佢日前就寫信畀立法會司法及法律事務委員會，要求開會討論事件，叫律政司快啲交代。
呢本備受爭議嘅書籍名為《一讀就懂！孩子必須知的法律常識》，當中提醒青少年畀警察發現背囊藏有生果刀嗰陣，有權喺律師抵達前唔回答任何問題，好似鼓吹緊青少年帶武器出街咁。EQ喺信入面問律政司，最近有幾多宗藏有攻擊性武器嘅案件被撤控，當中又有幾多係由翁提出法律意見？
質疑為何獲刑事檢控專員批准
EQ又話唔明點解翁出書前會得到刑事檢控專員梁卓然嘅批准，質疑梁根本冇睇過本書，加上翁喺出書後，竟然仲被調去因反修例風波而成立嘅「公眾秩序活動及電腦網絡罪行」特別小組，問律政司咁樣調職係咪蓄意構成公職人員行為失當同製造利益衝突？
其實法院近日積壓咗大量涉反修例嘅案件仲未處理，今次翁嘅事件令公眾進一步質疑律政司嘅專業性，如果律政司唔快啲作出交代，睇怕市民對律政司嘅信心會再創新低。
卓妮