中環出更：遙距授課 譚淑儀：老師變晒IT專家
口罩短缺，南區工商業聯合會早前到明愛胡振中中學派發口罩，依家復課無期，為咗鼓勵學生停課不停學，該校已開始使用Zoom遙距授課，副校長譚淑儀話唔單止學生要適應新模式，佢同其他老師都要變身「IT專家」，學用新科技教書同錄製教材，雖然佢哋唔算科技門外漢，但要同時設計課程兼鑽研程式功能都唔易o架！
雖然知識可以喺屋企學習，但譚副校覺得面對面嘅交流更重要，「學生透過鏡頭望住老師教舉啞鈴好似怪怪哋」，希望疫情快啲完結，師生再一齊上堂。佢又提到學校推行咗逾十年嘅全方位獎勵計劃，學生透過測驗同課外活動累積分數，再換取書券、文具同玩具等禮品，佢話細個讀書嗰陣要幫補家計，無時間參加活動，依家希望藉計劃鼓勵學生努力讀書之餘，仲可以多啲參與心儀活動，發揮所長。
丁加巍：摸索新一代溝通方法
該校教師丁加巍（丁Sir）諗起讀書嗰時，每日放咗學就好死板咁溫書做功課，同老師比較有距離感。丁Sir話隨住時代轉變，佢都要慢慢摸索點同新一代溝通，例如近年佢會陪學生一齊食飯傾偈兼種吓番茄，慢慢建立關係。早前學校收養咗兩隻被遺棄嘅烏龜，由師生一齊照顧，佢話喺照顧烏龜嘅過程中，除咗教識學生尊重同珍惜生命，大家仲慢慢成為咗好朋友添！
南區工商業聯合會會長陳鏡坤就話，好多少數族裔嘅學生移民嚟香港無耐就遇上疫情，佢哋家境未必負擔到口罩嘅炒價，加上學校由慈善團體營運，未必有能力資助到咁多學生，佢話自己舊時讀書嘅環境都好艱辛，對學生嘅困境都感同身受，所以佢同其他有心團體一定幫到就幫，陪大家渡過疫情難關。
卓妮