政情：公民講場：封食肆戲院 左諗右諗 邱騰華慢吞吞 靠害市民

新冠肺炎疫情全球大流行，近日已有專家建議政府強制規定酒吧、食肆、戲院等暫時停業，以減低疫症傳播風險，亦有飲食界人士話寧願全城停工廿一日斷傳播鏈，都好過依家咁慢慢被陰乾。不過政府對相關店舖係咪要暫停營業仲係猶豫不決，商務及經濟發展局局長邱騰華尋日仲話要同業界「坐低傾」，真係唔知傾到幾時。而政府至尋日傍晚終於公布將會修例禁止持酒牌嘅酒吧、食肆同會所等賣酒，但其實都係治標唔治本。對抗疫情本應分秒必爭，但政府就左諗右諗，最終仲係諗條屎橋，係咪攞香港人條命嚟較飛呢？