政情：避疫面壁食晏 徐英偉自嘆孤獨美食家
雖然政府已於今個月二號陸續復工，但政府總部嘅職員餐廳，要等到十六號先至恢復營業。勞工及福利局副局長徐英偉（Caspar）就喺餐廳重開當日，急急腳咁去回味一下久違嘅餐蛋麵加可樂。
經常幫襯職員餐廳嘅Caspar話，裏面啲大哥大姐個個都知佢脾胃。當佢入到餐廳準備落單，自己未開聲對方已經自動波咁打好張單。佢仲話餐廳職員都知道佢一旦選擇飲熱檸茶，就代表佢身體唔係幾舒服，所以佢都有同大哥大姐講笑：「係啊係啊，見我飲熱檸茶嗰日，記住同我保持距離啦」。
用膳得15分鐘 羅致光教食快餐
話說政總餐廳重開之後，為咗減低疾病傳播嘅風險，餐廳嘅座位設置全部面朝單一方向。Caspar嗰日就揀咗最靠近牆嘅位置嚟坐，雖則要面壁食飯，做個孤獨美食家，但就好安全。
之不過喺職員餐廳關閉嘅日子，Caspar又如何解決食晏嘅問題呢？佢話職務纏身，食晏最緊要快，若果只得十五分鐘時間用餐，佢就會去快餐店散買魚柳包同埋細可樂，所費只係十七元。食得咁慳家，原來係佢上司，勞福局局長羅致光教佢o架。