政情：屋企做運動 湯振傑自爆藏皮鞭練武
新冠肺炎疫情持續蔓延，為減少交叉感染，大家都多咗喺屋企。不過留喺屋企都唔代表一定冇運動同變肥嘅，保良局總理湯振傑依然都有做運動，但就改喺屋企做，講講吓仲自爆「藏械」添。唔使咁緊張，其實佢只係玩皮鞭練武啫。
本身係劍擊運動員嘅湯振傑運動量不嬲都大，好多運動都有涉獵。佢自爆一直都有買好多奇奇怪怪嘅器械喺屋企健身時用，但之前習慣出去做運動，所以無乜點掂啲器材。依家因疫情而留喺屋企耐咗，咪拎番啲器械出嚟玩囉。而其中一樣就係皮鞭，原來係俄羅斯武術嘅一種。佢仲話，俄羅斯武術仲有用長劍，但冇理由喺屋企舞劍咁危險，咪練住皮鞭先囉。
除罩放鬆 顧東華偏僻山路跑步
另一總理顧東華喺疫情期間都有保持運動習慣，不過佢就鍾意去跑山。依家多咗人去郊外玩同行山，唔知佢跑山嗰陣又有冇戴住口罩保護吓自己呢？佢就話跑山時一定會除口罩，因為太焗會好辛苦，跑唔到喎，所以就惟有去偏僻啲嘅山路跑喇。