政情：陳振彬「特訓」孩童 行山要拎兩桶水
新冠肺炎持續，唔少市民都寧願留喺屋企唔出街。九龍社團聯會會長陳振彬就堅持每日起身跑步，得閒仲會帶埋兩個小朋友行山。不過對佢小朋友嚟講，行山特別辛苦，皆因一路行一路要接受陳「特訓」，即係一人拎住兩桶水嚟行。真係諗吓都辛苦，究竟點解要咁做呢？
溪水冇污染 沖茶特別清甜
陳話，因為疫情關係要停課，老婆日日喺屋企做補習老師，教小朋友做功課，佢自己就返工同堅持每日跑步。一直以來佢哋都不缺親子活動，事關佢嘅小朋友六歲開始就會成家人每隔兩周去行山，一家人經過溪水時，仲會拎山水返屋企沖茶添。而佢嘅小朋友都要幫手拎，一人拎兩桶水咁話。
咁小朋友有冇呻辛苦呢？陳話其實一開始都有，但慢慢就慣。佢又話，行山嘅地方冇咩人居住，所以山水冇受污染，飲落較清甜喎。問到疫情結束後想去邊，佢就話︰「梗係去蘇梅島享受吓陽光與海灘啦！」