政情：陳沛然當黑 首次續會籍 連鎖書局即「玩完」
消費者取得連鎖店嘅會籍，購物無疑係享有優惠，不過續咗會籍冇耐店方就「執笠」，就只能夠講句唔好彩喇。醫學界議員陳沛然（Pierre）早前亦不幸遇到呢種情況。話說Pierre寓所附近有一間大型連鎖書局，日常所需嘅文房用品，佢都會去嗰度購買。
網友安慰 會籍喺星洲仍有效
約莫兩個禮拜前，佢又再幫襯呢間書局買咗一批信封，兼首次延續會籍。誰知過咗幾日，呢間大型連鎖書局捱唔過目前嘅巿道不景，宣布退出香港巿場，佢為期兩年嘅會籍，可以話開始咗冇耐就極速玩完，真係好黑仔呀。
到底Pierre有冇向消委會求助呢？咁就不得而知。不過佢都得到唔少同病相憐嘅網友留言安慰，話自己同Pierre一樣「中伏」，又有人話個會籍喺新加坡仍然有效喎。但亦有網友調侃，指Pierre終於成為呢間書局嘅永久榮譽會員咁話。