政情：石丹理火三角論分析示威

石丹理喺文中指出嘅十二項「燃料」包括市民對中央政府不信任、缺乏民族認同感、對香港政治系統不滿、經濟上感到有壓力、缺乏社會向上流動、過於強調學術重要性、在社會受壓導致心理健康受影響、家庭生活質素下降、缺乏生活所需技能嘅教育、喺正規教育課程中缺乏國民教育、政府反應緩慢及無力、多人聲稱警察使用過度武力及不作為等。而四個「強風」分別為虛假及失實報道、匿名化、公眾支持示威者，以及海外支持。

社會撕裂 市民患創傷後遺症

佢喺文章中批評示威者造成社會不穩定，旅客人數大幅下降百分之五十六，失業率亦持續攀升。佢又指示威者導致市民生活節奏大受影響，舉例話香港中文大學一役，示威者堵塞吐露港公路同埋阻止東鐵線行駛，導致新界東居民交通大受影響。另外，修例風波導致社會分裂，唔少人開始以「藍絲」同「黃絲」區分市民，仲導致唔少市民情緒受影響，更多市民患上情緒病，更有百分之十二點八嘅市民有創傷後遺症。

石丹理話四股「強風」令火勢蔓延，批評有人傳遞失實訊息，聲稱有一百萬同二百萬人遊行；示威者戴上面罩，匿名化變相助長示威者暴力行為；唔少人形容示威者為「小朋友」，博取公眾同情；海外人士亦支持示威者，將暴力行為形容為「理性」同「正義」，終導致「火勢」一發不可收拾。

促政府解決房屋問題 重推國教

至於應該點樣解決社會矛盾同平息事件呢？石丹理話，社會事件背後有好多深層次矛盾，認為應該解決市民生活質量嘅問題。佢提出幾個意見，包括同中央政府建立互信、培養民族認同感、完善政治系統、積極扶貧及解決房屋問題、提高社會向上流動性、改革教育制度、促進青少年福祉、宣傳家庭和諧相處、系統訓練生活技能、實施國民教育等。佢洋洋灑灑咁講出一大堆理論，全部都係社會老大難問題，可謂眾所周知。如果政府可以搞得掂嘅話，就唔會搞到依家一鑊泡啦。