中環出更：IT界議員寸爆 檢疫手帶低成效 高官冇智慧搞智慧城市
政府上周起向愛爾蘭等多個國家嘅入境人士實施家居強制檢疫措施，並需戴上政府提供嘅智能檢疫手帶，措施被批評成效不彰，唔少隔離人士更擅自剪手帶逃離「疫監」。資訊科技界議員莫乃光（Charles）就質疑政府冇增加檢疫地點，又點可以靠一個App（應用程式）同一條手帶抗疫，又寸爆成日都話要搞智慧城市嘅政府高層冇智慧，直言︰「智慧城市成功與否不在於技術，在於決策者的智慧」。
Charles尋日喺電台節目講及手帶出現嘅問題，暗寸第一代手帶成本高體積大，但就冇GPS功能，到近期有定位功能嘅手帶，但就供應不足，搞到要派紙手帶頂檔，檢疫成效真係可想而知喇。加上檢疫措施推得急，死線宣布後隨即每日有數千人湧港，對程序同程式設計嚟講近乎係不可能嘅任務。
斥家居隔離自相矛盾
佢又話，手帶嘅技術當然有改良空間，但技術不能解決所有政策不足帶嚟嘅問題，好似有隔離人士剪手帶，就超出咗技術問題，而係觸犯咗家居檢疫令，反問呢啲需要法律處理嘅問題，本港又有冇足夠嘅巡查支援。佢仲質疑本港目前進行緊嘅數以萬計嘅家居檢疫，亦有違增加社交距離嘅本意喎。
卓妮