中環出更：設廠成本低廉 詹嘉莉睇好孟加拉發展
製造業由發達國家轉移往較落後地區係大趨勢。金紫荊女企業家協會副主席詹嘉莉（Kelly）早喺廿年前已喺孟加拉設生產基地，目睹該國近年改善基建，又銳意提高國民教育水平。佢早前因貿易戰關係，更決定倍增當地廠房產能，都幾睇好當地發展咁噃。
不過Kelly又話，低廉嘅勞工成本同出口稅務優惠都係孟加拉嘅競爭優勢，但因當地勞工文化水準較低，生產效率亦遠遜中國工人，而且該國相當依賴中國提供零部件同原材料，所以要進身為工業大國，仍有好長嘅路要走。協會常務副主席鄺紫凌亦喺孟加拉有工廠，佢話當地民風淳樸，員工培訓要好有耐性，工作表現亦唔及得中國工人咁靈活同醒目，因此較為精細同高價嘅產品都係中國製造好啲。
林曉盈讚越南人巧手 適合車手襪
有「手套女王」之稱嘅青年工業家協會執行委員林曉盈就喺越南設廠。佢大讚越南人雙手比較纖細，好適合做車手襪工序，加上員工訓練後好快上手，態度積極，充滿朝氣，工作效率頗出色。雖然越南設廠有利於出口美國，不過為咗中國巿場，佢仍保留內地廠房。
香港模具及產品科技協會理事長陳鑑光就試過喺回教國家土耳其傾生意，同當地人食飯時發覺對方並冇嚴守飲食禁忌，後來先知係人哋為求賓主盡歡，彈性處理宗教規定。有當地人亦都同佢提到，佢哋信徒有時需要祈禱，不過如果係揸緊車，為咗駕駛安全，通常都唔會遵循呢個規定喇，話心裏有真神緊要過拘泥於宗教形式喎。
卓妮