政情：公民講場：病毒「環遊世界」80日 陳肇始慢吞吞 香港死得

本港新冠肺炎疫情確診個案持續上升，外國輸入個案亦都愈來愈多，港府防疫檢疫措施備受質疑。港大感染及傳染病中心總監何栢良尋日喺電台節目話，病毒喺過去八十日已「環遊世界」，加上下個月有長假期，相信好多港人準備外遊，部分或會去歐洲等地，而喺英國讀書嘅香港學生亦可能會趁假期返港，如果唔立即實施強制檢疫，好可能有新一輪大量輸入個案。不過政府就繼續慢幾拍，至目前只係對部分國家同地區實施強制檢疫，何直指政府依家嘅防疫措施係完全唔足夠。呢個政府做事一向都歎慢板，負責處理疫情嘅食物及衞生局局長陳肇始都因為處理疫情不力民望插水，真係唔知幾時先聽人講喇。