政情：海鮮舫結業 陳家駒憶朋友火劫餘生
喺香港仔屹立超過四十年嘅珍寶海鮮舫上周結業，唔少市民都到訪緬懷。建造業議會主席陳家駒亦特別傷感，仲喺該會主席隨筆提及海鮮舫，不過佢就唔係緬懷海鮮舫嘅美食，而係當年海鮮舫一場大火差啲令佢同朋友陰陽永隔。
陳家駒尋日發表以《勒緊褲頭》為題嘅文章，話一九七一年十月三十日，海鮮舫因為燒焊意外釀成大火，差啲奪走佢朋友張先生嘅性命。陳話，當年張先生為咗避火舌，從高處跳下，雖然最終逃過一死，「但在運動場他不可以再欺負我了。」
慶幸對方走出傷痛 終成測量師
陳慶幸張先生憑鬥志走出傷痛，成為專業嘅建築測量師，佢仲話相信張先生對屋宇條例嘅防火同走火要求會有特別體驗。不過陳都好感慨，話被火神洗禮嘅海鮮舫同香港一齊經歷無數起跌，每次都逢凶化吉，但今次新冠肺炎加社會人禍，就連身經百戰嘅海鮮舫都招架唔住，睇嚟未來兩三年港人都要勒緊褲頭咁話。