政情：議案表決 秘書處甩轆 議員促道歉
立法會係審議法案同審批撥款嘅地方，表決程序應要嚴謹。不過尋日立法會財務委員會表決有關元朗橫洲公營房屋發展工程撥款嘅臨時動議及撥款時就出現甩轆，仲搞到差啲要再投票。有議員直斥係立法會秘書處嘅責任，仲要求秘書處道歉。
冇響鐘進行 有違程序
根據議事規則，如議員要求記名表決，表決鐘需響五分鐘。尋日財委會會議，議員朱凱廸同譚文豪先後就有關橫洲嘅撥款提臨時動議，喺處理譚嘅臨時動議時，譚就指可以不記名方式投票，不過有議員就要求記名表決，由於上午環節嘅會議時間就結束，譚建議喺唔響表決鐘情況下記名投票。由於冇議員反對，譚嘅臨時動議同撥款項目都喺冇響鐘情況下進行記名表決。
不過議員其後收到通知，指是次投票有違程序，主持會議嘅財委會副主席陳振英喺會議下午環節解釋時，引述秘書處指就算冇人要求記名表決，但用咗投票機器就需響鐘，故此是次投票程序有「瑕疵」，而要重新投票。有議員指出，如兩次投票結果唔同或會被挑戰，議員鄭松泰就批評秘書處甩轆，應該要道歉。最終陳決定唔再投票了事。