政情：張秀賢被變性 斥政府求其
中性名字好容易會令人搞錯姓名擁有人嘅性別，過往都有區議員多次被政府「變性」，由男士變女士。曾出任學聯常委、喺去年區議會選舉勝出嘅元朗區議員張秀賢（Tommy）喺元朗區議會會議上嘅名牌就被寫成「張秀賢女士」。其實Tommy早有社運背景，都有一定知名度，咁都搞得錯個性別，唔怪得Tommy鬧爆佢哋求求其其喇。
網友「曲線」解讀 叫爭女性權益
Tommy尋日喺社交平台上載寫有佢姓名嘅名牌照片，原來係同康樂及文化事務署官員開會時其座位嘅名牌，不過名牌就寫咗「張秀賢女士」，幫Tommy變咗性。Tommy話，自己都做咗差唔多兩個半月區議員，質疑政府點解到依家開會都仲搞錯佢嘅性別，直斥政府做嘢馬虎。
正所謂識睇一定睇留言，同樣都係元朗區議員嘅李俊威就以一張女士照片回應，相中嘅女士都係叫「張秀賢」，不過就係政府部門嘅官員嚟嘅，仲有人留言話對方可能想Tommy爭取女性權益添。
