政情：無人可用過期回鍋肉起鑊 林鄭廢政府翻炒廢官周一嶽

歷年醜聞纏身 仍獲任醫委會委員

政府尋日公告，周一鑊獲委任為醫委會委員，由今年七月九日起生效，任期三年。廢鑊都可以再重用，真係匪夷所思。眾所周知，現年七十三歲嘅周一嶽曾喺政府掌管食物及衞生政策逾八年，任內屢爆傳染疫症及醫療失誤醜聞，對雙非及醫護人手問題後知後覺，終被上屆政府唾棄，於一二年七月上屆政府上任時黯然離開政府「熱廚房」。原以為市民夢魘可隨之結束，點知周一鑊翌年被「翻閹」任平機會主席，繼續挑起連串風波，包括推動檢討及合併現行四條反歧視條例，被指偏頗同越權，進行內部架構改革時又「肥上瘦下」，更亂花公帑擴建辦公室，「大花筒」嘅作風終令平機會喺一三至一四年度虧損近四百萬元。

周一鑊成事不足，敗事有餘，但政府竟不辨賢愚，再委任其出任醫委會委員，畀佢繼續有機會為禍本港。香港理工大學專業及持續教育學院講師陳偉強就話，周一鑊已係過氣人物，退出公共事務多年，如果佢早年做得好，政府自然會搵佢繼續擔任公職或續任平機會主席，呢兩樣都冇就已證明並唔認同其工作能力。殊不知事隔幾年現屆政府又再委任周一鑊，陳慨嘆政府人才庫似乎真係冇人好用，亦冇人想入呢個熱廚房，以致政府非「用人唯才」，而係「任人唯親」。陳又擔心周一鑊年事已高，難以緊貼時代脈搏，或已與社會脫節。

被質疑背景能力不適合 各界促交代

醫委會委員之一、病人政策連線主席林志釉接受訪問時質疑，周一鑊現時喺保險公司任顧問，有商界背景，而保險公司希望壓低醫療費用定價，或引用更多海外醫生，令相關費用下降，擔心周一鑊背景會影響醫委會對海外醫生嘅討論，認為周一鑊應考慮辭任保險公司職位。曾於食衞局任政治助理嘅議員陳凱欣亦認為，政府委任人選時應多考慮市民觀感，依家難免畀人質疑係咪冇更出色人選，覺得政府應清楚交代委任理據喇。