中環出更：泛民開會又拉布搞事 建制派衝主席台抗議
疫情陰霾下立法會唔少會議都取消或改期，近日先陸續開番會，內務委員會尋日開第十二次會，繼續討論選主席程序，一眾泛民議員未開會就玩嘢嗌收工，話怕人流聚集會出現交叉感染。本以為會議會完結，點知泛民同建制派就病毒應否用地名命名爭拗，仲搞到超晒時。對於泛民拉布，建制派都嬲爆，唔止斥責泛民濫權，仲衝埋出主席台理論，議員陳健波最後被趕埋出會議室。而會議浪費近兩小時，都係未選到主席。
尋日內會會議一開波，負責主持會議嘅議員郭榮鏗就提及「武漢肺炎」，隨即被建制派質疑以「武漢肺炎」稱呼疫情係歧視，會令武漢人日後抬唔起頭做人。民主派就反駁話未見過德國人對德國麻疹個名反感，又反問點解冇人要求將「香港腳」改名做「真菌腳」。
拗病毒名超時 仍未選出主席
兩邊陣營就病毒名字都拗到超晒時，身兼財委會主席嘅陳健波要求郭交場時就被指妨礙內會開會，最後仲被趕離場。議員何君堯對此相當不滿，仲衝出主席台鬧爆郭「濫權」，議員周浩鼎同黃定光亦嗌埋一份。民主派則不甘示弱，一齊重複叫「抬出去」口號。會議最終就喺一片爭吵聲中落幕，然後選主席嘅進程仍然都係得個吉喇。
卓妮