中環出更：派飯送暖多年 黃國權：行善唔容易
愛在疫情蔓延時，有學校喺停學期間用視像會議軟件上堂外，亦不忘為莘莘學子做個好榜樣傳遞愛心。長沙灣九龍工業學校校長黃國輝日前就聯同慈善機構愛心飯團喺學校外派飯同抗疫物資畀一班公公婆婆，原來佢哋一直都有合作開。不過派飯多年嘅愛心飯團創會會長黃國權就話做善事都唔容易，究竟發生咩事呢﹖
黃國權話佢做善事咁多年，當中都有唔少辛酸事，好似之前佢喺自己舖頭派發物資，但就因為排隊人龍太長，阻擋咗隔籬舖頭嘅門口，結果畀人鬧︰「你要做善事，我唔使做生意呀﹖」。佢最後又買餅賠禮又道歉，對方最後都下咗啖氣。雖然係咁，佢尋日派嘢時依然好落力，仲即場向街坊同公公婆婆傳授防疫小知識，又教佢哋點用搓手液。佢又話，學校今次派飯兼派埋搓手液，係校方主動搵佢哋資助嘅，算係︰「我出豉油你出雞」喎。
偕黃國輝派搓手液 教學生敬老
黃國輝就話，佢哋見到喺新冠肺炎疫情下，好多防疫物資都短缺，基層老人家見到防疫物資嘅炒價都嚇親，根本唔捨得去買，於是佢哋就趁學校停學，老師同實驗室都清閒啲，就跟足世衞標準整咗一千八百支搓手液畀街坊長者。佢仲話，其實學校一直都有同慈善團體合作派飯畀區內長者，希望教到學生識得感恩同敬老。
同場仲有愛心飯團副會長嚴偉貞同九龍工業學校校友會副主席李兆輝。李就話，依家嘅小朋友好多都係被幾個大人圍住嚟服侍，唔似舊時好早就要自立，所以佢哋喺疫情前都有叫小朋友幫手派飯，畀小朋友學吓點樣為他人服務。
卓妮