政情：公民講場：智慧燈柱遭批鬥 林偉喬跪低拆鏡頭

去年反修例示威期間，政府嘅多功能智慧燈柱被示威者肆意破壞，原因就係外界質疑智慧燈柱收集過多數據侵犯私隱，甚至指燈柱有人面識別系統。多功能智慧燈柱技術諮詢專責委員會召集人、政府資訊科技總監林偉喬尋日「跪低」，話為回應市民對個人私隱嘅關注，同意移除燈柱上嘅鏡頭同攝錄機，又話移除後仍可用其他科技取代，去收集相關數據。既然可以用其他科技取代，當初又點解要裝鏡頭同攝錄機，引起市民疑慮之餘，最終仲因為燈柱被破壞造成損失，真係冇嘢搵嘢嚟搞喇。