政情：八網難逃：點心作畫賀榮休 岑智明參透玄機
喺天文台工作咗三十四年嘅天文台前台長岑智明上個月中正式退休，不過四月初就會去日內瓦擔任世界氣象組織服務司司長。喺天文台服務咗咁多年嘅佢，收到同事送贈嘅退休禮物，份禮物就係一幅畫有岑智明個樣嘅卡通漫畫，但細心一睇，漫畫入面暗藏寓意。
寓意颱風山竹天鴿
岑尋日喺社交平台發布咗一張漫畫照片，仲留言話「衷心感謝同事和一位素未謀面嘅插畫家送嘅退休禮物」，漫畫入面寫有「香港天文台台長岑智明先生榮休愉快」字句，畫中嘅岑就坐喺度飲緊茶，真係梳乎。不過其枱面上嘅點心就好有寓意，皆因係山竹牛肉球同乳鴿，代表咗岑喺任期內經歷嘅兩個超強颱風「山竹」同「天鴿」。
岑都大讚漫畫極為貼切兼貼地，仲話製造咗好多難得嘅緣分，不過佢就賣咗個關子，話遲啲有時間再同大家分享喎。有網民就講笑話「山竹」同「天鴿」係岑最難忘嘅食物，又有網民提議如果畫入面加多個叫做「韋森特」嘅侍應就完美喇。韋森特係邊個？咪又係颱風名字囉。