政情：做義工被偷內衣 楊婉珊爆精彩故事
做義工幫到人之外，亦都可以感受到不一樣嘅生活體驗。榮華慈善基金常務副主席楊婉珊早前同一眾義工派口罩，仲去咗曾經有新冠肺炎確診個案嘅長康邨康美樓，成班後生仔女都話自己後生、抵抗力高，唔怕感染，期間楊就自爆佢學生時期做義工時有「精彩」故事，究竟係乜嘢呢？
無損熱情 繼續組團行善
話說楊當年喺外國讀書時，參加過去非洲嘅義工團，負責派吓物資同設立供水系統。但有次佢出去做義工活動時，住處就發生盜竊事件。唔知算好彩定唔好彩啦，佢哋當日啲證件都帶喺身，所以冇唔見，但佢哋嘅私人物品就「無一幸免」被偷晒。最好笑嘅係唔知個賊有乜嘢癖好，定係純粹順手，連楊嘅底衫褲都偷走埋，搞到楊都好尷尬。
楊又話，雖然喺做義工過程中畀人偷過內衣，又去過有傳染病嘅地方，但都無阻佢做義工嘅熱情，佢唔止會繼續參加義工活動，仲會組織多啲專門畀年輕人參加嘅義工團，等多啲後生仔可以豐富吓人生咁話。