政情：張文龍公開送花 梁嘉銘唔受

示威不成轉贈 梁話驚有菌

話說尋日警方代表出席葵青區議會會議，期間張文龍就拎住支白花衝去警方代表示威抗議，結果唔成功。之後張就將支花掟咗去梁嘉銘座位，梁隨即反問：「你送花我一定要收？拎番走啲垃圾！」其他民主派議員就起哄，反指梁阻住會議進行，仲展開激烈討論。區議會主席單仲偕最終要宣布暫停會議。

張文龍其後就想走人，但梁嘉銘就堅持要張拎走埋支花，仲多次用身體攔截張，唔畀張離開會議室，又話慎防「有菌」，要求工作人員向支花噴消毒水。最後支花就被遺留喺梁嘅座位兼且斷埋，真係惹人可憐。