中環出更：望3秒過關 梁繼昌斥機場檢疫Hea爆
新冠肺炎疫情喺全球蔓延，各國確診個案急速上升，衞生署日前公布所有乘搭航班嚟香港嘅乘客都必須填寫健康申報表。會計界議員梁繼昌（Kenneth）早前就同其他議員齊齊訪美，尋日朝早就由美國乘飛機返抵本港。作為監察政府嘅代議士，Kenneth填寫健康申報表嘅同時，當然都順便睇吓政府機場防疫工作做成點啦。之不過Kenneth就鬧爆機場檢疫工作係「Hea做」，仲話職員只係睇咗佢張申報表三秒，就畀佢入境喇。
指齋填健康申報表冇用
Kenneth抵港後隨即就喺社交網站發布咗一張健康申報表嘅照片，佢話佢同其他同行議員都好認真咁填寫健康申報表上嘅各項細節，而申報表上只係要求入境乘客填寫基本個人資料、入境航班編號、有冇發燒、咳嗽同氣促等肺炎徵狀資料，都算簡單。而落機後，機場已用繩分隔開兩條隊，叫覺得自己有病徵嘅人排埋一邊，冇事嘅人就排另一邊，自然全部乘客都排去冇事嗰邊，所以佢真係睇唔到呢張健康申報表點樣能夠控制有病徵嘅乘客入境喎。
佢又話，職員其實只係睇咗張申報表三秒，就叫佢繼續經電子通道入境喇，連體溫探測都慳番，難怪佢大鬧呢種做法Hea到令人沮喪啦。
卓妮