中環出更：孫秉樞無懼逆境 裝備自己靜待黎明
本港經濟喺社會不穩同新冠肺炎疫情影響下大受打擊，各行各業都叫苦連天。有「鐘錶大王」之稱嘅香港鐘表業總會永遠名譽會長孫秉樞似乎就冇有怕，直言覺得冇問題，事關有逆境自然亦有順境喎。佢仲話只要無時無刻都裝備好自己，等到機會嚟嘅時候就可以再出擊。
雖然本港經濟受挫，但孫話其公司生意額並非認真好差，同埋佢哋早前同內地幾個鐘錶品牌合作、喺香港國貨公司發售嘅產品生意都唔錯，呢幾個合作項目成一年前已開始籌備，所以要睇得好準，好彩佢兩個仔都可以獨當一面，遇到問題又會一齊商量度掂佢。唔怪得佢咁淡定喇。
沈慧林趁停工籌備未來
總會會董沈慧林就趁呢段時間籌備未來發展動向。佢內地多間廠房早前暫停運作，但佢都有支付薪金畀員工，而本港嘅寫字樓就裝修，話希望可以等員工做嘢時有一個更好嘅環境喎。佢又話自己相信有危就有機，仲寫咗八個字「同心協力，共渡難關」鼓勵員工添。佢又提到，最近多咗時間享受家庭樂，早排就帶埋女兒去郊區吸收新鮮空氣，一家三口仲去摘士多啤梨，邊摘邊食，不知幾開心。
轉頭見到做物業投資嘅新界潮人總會主席莊健成，問佢市道咁差，仲會唔會入市。佢話如果物色到好嘅物業都唔怕，最緊要計吓回報好唔好，仲話香港人見慣風浪，對香港前途好有信心，而喺呢個艱難日子最緊要係同員工上下一心，佢廿幾年前同老婆開咗間餐廳，請咗一班伙記，大家好似朋友一樣，認為老闆一定要信任員工，員工先會落力去做，所以佢曾經有員工辭職，轉頭又返嚟做，佢都無任歡迎。
卓妮