政情：被歧視火滾 市民轟李文浩政棍
深水埗區議員李文浩日前喺佢嘅議員辦事處外張貼「藍絲與狗不得內進」嘅通告，繼前日有市民踩場狠批李歧視後，尋日再有一批市民到其辦事處外抗議，炮轟李係港獨政棍同人渣，直指李揀顏色服務居民係公職人員行為失當，應立即取消（DQ）其區議員議席。
涉公職人員行為失當 促DQ
十多名市民尋日下晝到李文浩嘅議辦外抗議，佢哋拉起橫額同高舉印有李嘅肖像同寫上「公帑養狗」、「DQ李文浩」、「忘祖宗」同「正人渣」等紙牌，高喊「港獨政棍」、「不為民生 只為鬥爭」、「出口傷民 有失身份」、「李文浩可恥」等口號，指李侮辱歧視居民，應立即拘控，而李選擇性服務居民根本係公職人員行為失當，應立即DQ。
發起今次行動嘅召集人潘先生斥李身為中國人，但就貼出歧視性字眼，實屬背祖忘宗。
尋日嘅抗議行動李文浩雖則未有現身，不過佢就喺社交網站上載咗一段到場抗議人士吐口水嘅短片。佢貼文話藍絲需要為香港爆發新冠肺炎負上責任，以及欠香港人一個道歉！跟住仲Hashtag埋「咁樣嘅藍絲，我哋真係要服務佢？」