政情：麥美娟再發重炮 呢個政府冇擔當
香港社會喺舊年年中開始立立亂，先有反修例風波搞到社會嚴重撕裂，今年就因新冠肺炎疫情令人心虛怯，更一度出現搶購潮，然而政府就慢幾十拍，等到出晒事先知衰。眼見政府要人踢先識郁，建制派嘅議員麥美娟（Alice）都睇唔過眼，直斥政府喺反修例風波同新冠肺炎疫情方面嘅解說工作做得唔夠同埋冇擔當，仲形容政府官員「好離地、好佛系」，直指政府要認真檢討吓。
喺反修例風波時期，政圈曾盛傳Alice同特首林鄭月娥喺禮賓府閉門會面時，情緒激動爆粗鬧林鄭。Alice至今未有承認或否認，但尋日喺電台播出嘅訪問中，佢話自己一向講嘢都係好直接，而且都係想市民同香港好，認為政府要知道市民諗緊乜嘢，冇理由見到政府有做錯都唔講真話。被問到會唔會後悔時，佢仲話講咗嘅嘢收唔番，亦唔會後悔。
修例懶解說 炮製社會撕裂
Alice形容修例內容冇乜嘢，唔係社會上講到咁恐怖，但就認為事件係好不幸，而且話最大問題係市民對政府冇信心，而政府就事件嘅解說工作做得不足。佢話當時有問過政府會唔會出嚟澄清，但對方只係話已經講咗，而佢就覺得政府係應該要檢討吓解說方法，唔係出嚟見記者答問題就叫講咗。
超市搶購潮 拒落區安民心
對於防疫同抗疫工作，Alice就話經過咗幾個月嘅政治風波，政府做嘢變咗畏首畏尾，驚點做都會畀人鬧，要諗到好完美先做，搞到喺防疫工作上變得困難。佢以近期超市出現搶購潮為例，話曾向政府官員建議搵局長去超市行個圈，同市民講會有米，唔需要驚，但對方就只係話驚冇人理，佢就認為政府官員應該要有擔當同埋唔使驚冇人理。
反修例風波唔單止搞到社會撕裂，連帶令區議會都大換血，民主派贏得逾三百議席，包括Alice在內好多建制派嘅資深區議員都敗選。佢話有預計過結果，做咗心理準備，所以都冇乜可惜或失落嘅感覺。雖然冇咗區議會議席，但佢仍會落區見街坊，亦已為未來做咗打算，表明唔會輸咗議席就乜都唔做，仲講笑話如果可以轉行，就同啲同事一齊去開車仔麵檔添！