中環出更：婦女節反思 趙傑文：性別平等 仲有進步空間
每逢三八婦女節，都會令人反思男女平等嘅概念，究竟依家香港職場又做唔做到男女平等呢？經營社企餐廳嘅傑出青年協會前主席趙傑文，就指廚房工作依然都係以男性為主，原因係廚房溫度高，加上中菜使用嘅生鐵鑊同斬骨刀都好沉重，女仔氣力較弱，擔任中廚難免會好辛苦。
不過趙傑文又話，女仔通常較為細心，所以餐廳門面同管理嘅工作就會好勝任。其實西餐嘅烹煮器具都比較輕，女仔做西廚都可以有唔錯嘅發揮。但一講到點心同燒味，都仲係男士嘅世界。而日式菜系可能礙於傳統，暫時未見有女仔做壽司師傅。雖然佢都好認同性別平等，而好多大公司嘅高層都係由女性擔任，但進步空間仍然係有囉！
嚴禧華話工種易先入為主
趙傑文尋日係以嘉賓身份，出席全港時尚專業女性選舉開幕禮，同場仲有城市女青年商會商務發展董事張立兒，籌委會主席姚燕君，副會長司徒詠詩同會長嚴禧華（Athena）。本身從事網上營銷工作嘅Athena話，電子世界較少女性涉足，可能係電子世界予人男性主導呢個先入為主嘅印象，以致好多女士唔打算去應徵。佢又話，女性本身對自己要求多多，會好在意人哋點睇自己，不過只要平衡番個心態，女性都可以有好大嘅作為。
講到男女平等，國際青年商會基金（亞洲及太平洋區）委員譚麗時（Angel）就認為話雖如此，好多公司都仍然由男士主導。Angel話男人返到屋企都有太太呢一個賢內助幫吓手，但女士則往往要兼顧家庭同事業。最近韓國新冠肺炎肆虐，口罩難求。
Angel識得一個韓國朋友，佢嘅太太平時好柔弱，但係面對疫情嘅關鍵時刻，太太已經買咗口罩同張羅好一切。Angel又話識得有朋友最近生BB，但因為疫情關係家人無得去醫院探望，朋友嘅先生先至明白到太太嘅辛苦同偉大。
卓妮