政情：公僕在家工作 區會移師街頭
新冠肺炎疫情肆虐，政府宣布公務員在家工作，政務司司長張建宗日前都停止咗未來兩個星期各區嘅區議會會議，政府唔會提供場地同埋秘書服務。不過，有區議會就話會繼續開會，無場地咪街頭開囉！
懶理政府叫停會議
大埔區議會本身會喺今日召開醫療、教育及社會服務委員會會議，雖然大埔民政專員話未能為委員會會議提供場地同秘書處支援服務，區議會打算進行公眾會議，討論新冠肺炎嘅相關議題，好似大埔醫護人員裝備不足、賽馬會診所被改作肺炎診所等等，區內居民都可以參加，會喺大埔墟街市及熟食中心二樓平台開會。
深水埗區議會就直頭喺街邊開！區議會主席楊彧話區議會係由市民選出嚟嘅，開唔開會係區議會而唔係政府話事，聽日嘅大會將審批有關防疫工作嘅撥款，地點就改喺長沙灣政府合署地下。真係變成街頭議會喇！