政情：疑收懲教署口罩 姚國威高呼老屈
依家市面「一罩難求」，但喺網上瘋傳一張照片，指工聯會元朗區前區議員姚國威（圓圖）疑似收到五十盒由懲教署工業組（CSI）女囚犯生產嘅口罩（CSI口罩），網民大鬧政府同建制派之間「公器私用、私相授受」。姚國威喺網上聲稱被人「老屈」，並已就事件報警。
被指私相授受 已報警
由懲教署生產嘅口罩淨係供應畀政府，但根據網上嘅照片顯示，口罩盒上面印有「工聯會姚國威支部」嘅字樣。有網民就質疑政府「公器私用、私相授受」，仲話「香港大難臨頭，政府都仲政治行先」，有網民仲留言，質疑有公務員無恥地將成盒口罩拎畀人，仲話本身CSI口罩就規定係「堂食，唔畀成盒拎走o架！」
有關照片喺網上瘋傳後，姚國威就喺社交網站拍片澄清，指有關照片係虛假照片，並到元朗警署報案，呼籲市民勿誤信呢啲抹黑謠傳，並促請政府盡快穩定口罩嘅供應。