政情：元朗區會照開會 民政署疑大細超

北區、黃大仙、葵青同埋屯門區議會早前分別召開特別會議討論防疫工作，但只有北區係有民政署支援，其他區議會就搞到要班議員淪落街頭、甚至開「山寨」會議。早前民政署解釋，話因為北區區議會係針對暉明邨唔再做隔離前線醫務人員嘅臨時宿舍事，屬緊急性質，所以特別安排出席。

政府上星期再宣布，延展公務員在家工作嘅時間到下周日，點解元朗區議會又開得成？元朗區議會副主席麥業成接受查詢時就話，本身會議原定喺上周五舉行，但因為政府宣布咗公務員在家工作安排，所以當時就改咗喺今日開會，而民政署因為一早承諾咗，所以會派人嚟，而且有官員出席會議。

為減低疫情傳播風險，秘書處人手亦會減少，所以今日嘅會議不設公眾席，但傳媒同議員助理就可以入會議室，市民可透過直播監察會議。