政情：防疫失職被翻舊帳 陳肇始被轟害人精

陳肇始上個月二十一日喺Fb上載咗張相，當日係佢落區視察口罩嘅供應情況，見佢無戴口罩，而相中所見，口罩四十五蚊一盒。佢話口罩整體供應正常、價格尚可，又話政府一直嚴陣以待，已經做好最嚴謹同充足準備，大家必須同心協力，守好每一道衞生防線，減低疾病在社區傳播嘅機會，先能夠克服呢個難關，仲標籤「迅速應變」。

雖然當時未有確診個案，但嗰句迅速應變就真係啃唔落，實際上政府應變慢人幾十拍。網民鬧爆陳肇始係「狗官」同「害人精」，又話「呢個時候邊度仲有四十五蚊盒口罩賣 」、「係咪當香港人傻（口架）」、「香港人排隊排幾個鐘都買唔到（口罩）」，怒斥「你（陳）仲好意思講口罩價格尚可同供應普遍正常」，亦有網民話幾百個市民喺凌晨十度寒流下排隊，反而仲容易交叉感染病毒。

檢測慢吞吞 應問責下台

亦有網友狠批陳肇始把關不力，話全世界一早話要留意事態嚴重，但陳仲話唔會有事，遲遲唔檢測武漢來港嘅人流，香港先會有咁多人中招，明顯嚴重失職，又話佢犯錯令港人受苦。有網民指一眾高官出緊納稅人嘅糧，但乜嘢都無做，罔顧香港人嘅安全，全部都應該要問責下台。

近呢幾日就多咗網民要求政府封關，有網民話「唔封關，送畀我幾多個口罩，最後都唔會捱得住！」都有網民批評陳肇始將一班服務市民嘅醫護人員嘅生命較飛；亦有網民寸陳肇始係咪去咗平行時空先有口罩買，叫佢都係返去火星喇，地球唔啱佢（口架）！

乜嘢叫急市民所急？陳肇始連口罩嘅供應量都答唔出，難怪市民嬲到噴火。